ALJIR ARMIYASINI XITOY QUROLLARI BILAN TA’MINLASHNI JADALLASHTIRMOQDA

Shimoliy Afrikadagi eng qudratli armiyalardan biri bo‘lgan Aljir qurolli kuchlari Xitoy artilleriyasi va uchuvchisiz dronlari bilan qurollanish orqali o‘z kuchini yanada oshirmoqchi.

Joriy oyning boshlarida Defence Weekly’da Aljir poytaxti tashqarisida harakatlanayotgan o‘ziyurar PLZ 45 zambaraklarinining surati e’lon qilingan edi. Aljir qurolli kuchlari uchun yangilik bo‘lgan bu zambarakni 50 ga yaqin harbiy transportdan iborat bo‘lgan konvoy Blidadagi Markaziy Naqliyot Bazasiga kuzatib qo‘yganligi ma’lum qilingandi.

To‘liq nomi Norinko PLZ 45 bo‘lgan bu o‘ziyurar zambaraklar 1990-yillarda eksport uchun yaratilgan bo‘lib, Saudiy Arabistoni va Quvaytga sotilgan. Zambarak daqiqasiga 2-5 ta snaryadni 24-39 km masofaga yetkazish imkoniga ega. Shuningdek, alohida tashuvchi transport bilan ta’minlangan.

Shu bilan birga, Aljir Xitoyning Sianglong uchuvchisiz dronlarini sotib olishni ham rejlashtirmoqda. Bundan oldinroq paydo bo‘lgan xabarlarga ko‘ra, masofadan boshqariluvchi dronlar o‘tgan yilning yozida Aljirning janubiy Tamanrasset hududida muvaffaqiyatli sinab ko‘rilgan.

Sianglong (Ulkan ajdar) droni Gujou Aviatsiya Korporatsiyasi tomonidan yaratilgan bo‘lib, ilk bor Xalq Ozodlik Armiyasi Havo Kuchlari tarkibida sinab ko‘rilgan. Droning umumiy uzunligi 14, balandligi 5, qanotlari uzunligi 25 metrni tashkil qiladi. 750 km/soat tezlik bilan 10 soat uchish imkoniga ega.

Aljir Mudofaa Vazirligi bayonotiga ko‘ra, Xitoydan 90 ta jangavor dronlar sotib olinadi. Shuningdek, Aljir hukumati Birlashgan Arab Amirliklaridan o‘rta masofaga uchuvchi dronlar sotib olishni ham rejalashtirgan. Mahalliy El Vatan gazetasining yozishicha, Rossiyadan 30 ta E95 dronlarini sotib olish borasida ham muzokaralar o‘tkazilmoqda.

Aljirning qo‘shnilari Liviya va Malida bo‘lib o‘tgan va hanuz tinchimagan voqealar mamlakat hukumatini tashvishga solib qo‘ygan. Shu tufayli, Aljir havodagi ustunlikni qo‘lga kiritishga intilmoqda.

Aljir qidiruv-razvedka imkoniyatini oshirish maqsadida shu turdagi qator uskuna va uchoqlar sonini ko‘paytirishga zo‘r bermoqda. Hozirda 12,000 aljirlik askarlar mamlakatning Mali, Liviya va Niger bilan chegaralarini qo‘riqlashmoqda.

Mamlakatning 2014-yilga mo‘ljallangan byudjetida harbiy harajatlar oshirilganini ko‘rish mumkin. Ma’lumotlarga qaraganda, 2017-yilga borib harbiy harajatlar davlat byudjetining 6 foizini tashkil etadi.

Eslatib o‘tish joiz, DUNYONING7 TOBORA HARBIYLASHAYOTGAN DAVLATI nomli maqolamizda Aljirni harbiylashayotgan davlat qatoriga qo‘shgan edik.