HAMID KARZAY: “TERRORCHILIK AMALLARI ORTIDA AQSH TURGAN BO′LISHI MUMKIN”

Ba’zi hollarda AQShni reydlari davomida tinch fuqarolarning o‘limiga sabab bo‘lishda ayblab keladigan Afg‘oniston Prezidenti Hamid Karzay endilikda mamlakatda tez-tez sodir bo‘layotgan terrorchilik amallari ortida ham amerikaliklar turgan bo‘lishi mumkinligiga ishora qildi. Karzayning bu boradagi shubhalarini afg‘on hukumati tarkibidagi amaldorlardan biri ma’lum qilgan.

Amaldorga ko‘ra, Karzay o‘zi AQSh ishtiroki mavjudligiga ishongan o‘nlab terrorchilik amallari ro‘yhatini tuzib chiqqan. Ushbu ro‘yhatdan 17-yanvar kuni poytaxt Qobuldagi La Taverna du Liban restoranida sodir etilgan va jahon hamjamiyatini larzaga solgan terrorchilik amali ham o‘rin olgan.  

Karzayning da’vo qilishicha, amerikaliklar uning qudrati va Afg‘onistondagi barqarorlikni izdan chiqarish orqali mamlakatni o‘z ta’sirlari ostida saqlab turishga urinmoqda. Biroq prezidentning bunday da’volarini oshkor qilgan amaldor Karzay AQShni ayblashda biror ishonchli asosga tayanolmasligini tan olgan.

Afg‘on rahbarining bu bayonotiga izoh bergan AQSh vakillari ayblovni qat’iy ravishda rad etib, afg‘on hukumati qudratini mustahkamlash uchun milliardlab dollar sarflanayotgan bir paytda uni ojizlantirishga urinish mantiqsizlikdan boshqa narsa emasligini ta’kidlashmoqda. AQShning Afg‘onistondagi elchisi Jeyms Kanninghem Karzayning da’volari reallikdan uzilib qolgan konspiratsion (fitnaviy) qarashdan boshqa narsa emasligini aytgan.

Tahlilchilarning fikricha, Karzayning ayni shu vaqtga kelib bunday ayblovni ilgariga surayotgani sabab 2014-yildan keyin AQSh harbiylarining mamlakatda qolishiga doir xavfsizlik shartnomasini imzolamaslikka vaj qidirayotganligida bo‘lishi mumkin. Shuningdek, Karzay Tolibon bilan tinchlik o‘rnatish maqsadida AQShdan uzoqlashishga harakat qilayotgan bo‘lishi mumkinligi haqida ham fikrlar bildirilmoqda.

Afg‘on hukumati AQShni terrorchilik amallari niqobi ostida Tolibon va boshqa jangari guruhlar bilan hukumat o‘rtasidagi aloqalarni yanada keskinlashtirib, mamlakatda beqarorlikni kuchaytirishga urinishda ayblamoqda. Karzayning aytishicha, 17-yanvar kuni Livan restoranida sodir bo‘lgan terrorchilik amali o‘ta yuqori taktika va qurollar vositasida “xorijiy maxfiy hizmatlar” tomonidan amalga oshirilgan, Tolibon yoki boshqa guruhlar bunday aktni sodir etish imkoniga ega emas.

O‘z navbatida AQSh rasmiylari 12 yil davomida Afg‘onistondagi vaziyatni o‘nglash uchun harakatlar olib borilib, yana barqarorlikni izdan chiqarishdan ma’no yo‘qligini ma’lum qilishgan. Ularning fikricha, AQSh bilan 2014-yildan so‘ng uchun xavfsizlik shartnomasini imzolash Afg‘oniston uchun muhim ahamiyatga ega.