MARKAZIY AFRIKA RESPUBLIKASI POYTAXTINI ISYONCHILAR EGALLAB OLDI

Markaziy Afrika Respublikasi poytaxti Bangi shahrida o`tgan haftaning so`ngida isyonchilar va hukumat kuchlari o`rtasida qator qurolli to`qnashuvlar ro`y bergan. Mamlakat prezidenti Fransua Bozize esa Fransiya hukumatidan vaziyatni o`nglash uchun harbiy yordam so`ragan.

Seleka nomli mahalliy isyonchi guruh o`tgan hafta tabiiy zahiralarga boy, sobiq Fransiya koloniyasi bo`lmish MAR hukumati bilan qurolli ziddiyatlarni qaytadan avj oldirgan edi. Guruh Bozize hukumatini yanvarda imzolangan isyonchilarni hukumat armiyasiga qabul qilish bo`yicha ikki tomonlama shartnomaga amal qilmaganlikda ayblamoqda.

Seleka guruhi hukumatni shartnomaga amal qilmaganlikda ayblamoqda

Reyter agentligining xabar qilishicha, shu kecha kunduzda isyochilar poytaxtning shimoliy, prezident qarorgohiga juda yaqin qismini o`z nazoratlariga olishgan. Bundan tashqari isyonchilar tinch aholi niqobida shaharning boshqa qismiga ham ko`chib o`tmoqdalar.

Tasdiqlanmagan xabarlarga ko`ra, hukumat kuchlari faqatgina prezident saroyi joylashgan hududda nazoratni ushlab qolishga muvaffaq bo`lgan, xolos.

Bugun Seleka isyonchilari Bangi shahrini elektr bilan ta`minlaydigan yagona stansiya – Boalini egallab olishdi va uni o`chirib qo`yishdi. Shu sababli ayni damda MAR poytaxti butkul elektrsiz qolmoqda.

Otishmalar davom etayotgani to`g`risida xabarlar yo`q.

Elektr yo`qligi sabab, ayni vaziyat haqida xech kim xech narsa bilmayotir.

Nelson Ndjadder, Seleka guruhi so`zchisining so`zlariga qaraganda, isyonchilar hukumat kuchlariga qarashli vertolyotni urib tushirishgan va prezident saroyini egallash uchun tayyorlanishmoqda.  

Hukumat so`zchisi Krepin Mboli-Goumba esa poytaxt nazorati haliga qadar hukumat qo`lida ekanligini aytmoqda. Unga ko`ra: “Bozize hanuz qudratda, poytaxt qo`ldan boy berilmaga”.

Prezident Fransua Bozizening taqdiri haqida aniq xabarlar yo`q

Fransiyaning Le Monde gazetasining yozishicha, Bozizening oilasi Ekvatorial Gvineyaga evakuatsiya qilingan, prezidentning o`zi esa poytaxtda qolmoqda. Biroq bu xabarni ham tasdiqlashning imkoni bo`lmagan.

Markaziy Afrika Respublikasi uran, oltin va olmos zahiralariga boyligiga qaramay, dunyodagi eng rivojlanmagan davlatlardan biri sanaladi.

Seleka mahalliy isyonchilardan tashkil topgan guruh hisoblanib, o`tgan yili ham Bozize armiyasiga qarshi poytaxt ostonasida qator qurolli hujumlar uyushtirgan edi.  

Joriy isyon mamlakatning 1960-yilda Fransiyadan mustaqil bo`lganidan buyon boshidan kechirayotgan eng katta inqirozidir.

Diplomatik manbaalarga ko`ra, Fransiya Bangi xalqaro aeroportini muhofaza qilish uchun mavjud 250 nafar askarga qo`shimcha ravishda yana 150 nafarlik guruh jo`natgan.

Bangi aeroporti mamlakatda yashovchi 1,200 nafar Fransiya fuqarosini evakuatsiya qilish uchun yagona chiqish nuqtasi hisoblanadi.

Janubiy Afrika Respublikasi Bozize armiyasini qo`llash uchun 400 nafar askar jo`natgan. Bundan tashqari Markaziy Afrika Hududiy Bloki doirasidagi davlatlardan ham yuzlab tinchlikparvar kuchlar isyonchilarga qarshi kurashish maqsadida Bozize qo`shiniga kelib qo`shilishmoqda.